2013年5月23日

黑雨學生哥

黑雨學生哥

受訪自爆未做好功課 誠實學生哥 網民笑呵呵

【明報專訊】噚日黑雨下學校停課,但唔少人起身都唔聽新聞就返咗學,無綫新聞記者朝早就訪問到學生哥,呢段片噚日喺網上熱播,好多人睇到都話好笑。事緣其中一個被「扑咪」嘅男學生,好似食咗「誠實豆沙包」咁,被問唔使返學、返屋企會做乜嘢時,男生話返屋企要做功課,因為「仲有少少」未搞掂!

黑雨學生哥
受訪自爆未做好功課 誠實學生哥 網民笑呵呵(圖/擷取自youtube畫面)

網上熱播 網民會心微笑

呢段新聞片噚晚網上已有近萬個瀏覽,仲有千幾個share。呢個男生唔知停課,記者於是問「唔使返學呀,咁你家點呀?」佢就答「都算好開心!」,記者問佢返屋企會做乜,佢話要做功課,記者再大聲少少問佢,「你唔係做晒功課先返學咩?」學生哥就尷尬咁話﹕「仲有少少未做好。」

呢段片有唔少人回應,有人話要笑吓呢個可愛學生哥,有人話佢第日返學一定會畀老師捉去「照肺」。不過,都有好多人撐佢,話大家都讀過書,好多人都試過唔做功課啦,所以只會會心微笑。有網民就將渠務署宣傳廣告二次創作——「黃雨,為大地帶來麻煩;紅雨,為大地帶來希望;黑雨,為大地帶來歡樂。」

黑雨學生哥 原文: 受訪自爆未做好功課 誠實學生哥 網民笑呵呵

Related Posts Plugin for WordPress, Blogger...